ଏକ ଦୁଃଖଦ ଏବଂ ଏଡ଼ାଯାଇପାରୁଥିବା ବିପର୍ଯ୍ୟୟ

ଏକ ସାଧାରଣ ଦିନରେ SCB ମେଡିକାଲ କଲେଜରେ ୧୨ ଜଣ ରୋଗୀଙ୍କ ମୃତ୍ୟୁ ଘଟିବା କେବେବି ସ୍ୱାଭାବିକ ନୁହେଁ। ଏହା ଏକ ଅତ୍ୟନ୍ତ ଦୁଃଖଦ, ତଥାପି ସ୍ପଷ୍ଟଭାବେ ଏଡ଼ାଯାଇପାରୁଥିବା ଘଟଣା, ଯାହା ଇଲେକ୍ଟ୍ରିକାଲ ଶର୍ଟ ସର୍କିଟ୍ ପ୍ରତିରୋଧରେ ଗୁରୁତର ଅବହେଳାକୁ ପ୍ରକାଶ କରେ।

ରାଜ୍ୟର ଏକ ପ୍ରମୁଖ ଏବଂ ପୁରାତନ ମେଡିକାଲ ସଂସ୍ଥା ଭାବେ, ଏହା ଅନ୍ୟ ସଂସ୍ଥାମାନଙ୍କ ପାଇଁ ଏକ ଆଦର୍ଶ ସୃଷ୍ଟି କରିବାକୁ ଥିଲା—କିନ୍ତୁ ଦୁର୍ଭାଗ୍ୟବଶତଃ ଏଠାରେ ଆମେ ତାହାର ପୂର୍ଣ୍ଣ ବିପରୀତ ଦୃଶ୍ୟ ଦେଖୁଛୁ।

କ୍ଲିନିକାଲ ଇଷ୍ଟାବ୍ଲିଶମେଣ୍ଟ ଆଇନର ଧାରା ୧୦ ଅନୁଯାୟୀ, ନିବନ୍ଧନ ଏବଂ ପୁନଃନବୀକରଣ ପାଇଁ କିଛି ମୂଳଭୂତ ନିୟମ ଅବଶ୍ୟ ପାଳନୀୟ—

୧. ୨୦୧୭ ପରେ ନିର୍ମିତ ସମସ୍ତ ଭବନ ନ୍ୟାସନାଲ ବିଲ୍ଡିଂ କୋଡ୍-୨୦୦୫ ଅନୁଯାୟୀ ହେବା ଆବଶ୍ୟକ।
୨. ପର୍ଯ୍ୟାପ୍ତ ଅଗ୍ନିନିର୍ବାପଣ ସାମଗ୍ରୀ ଓ ସୁବିଧା ସହିତ, ଅଗ୍ନିନିର୍ବାପଣ ଯାନ ଚାରିଦିଗରୁ ପହଞ୍ଚିପାରିବା ବ୍ୟବସ୍ଥା ଥିବା ଦରକାର।
୩. ଅପେକ୍ଷାକକ୍ଷ ଓ ସାଧାରଣ ଅଞ୍ଚଳରେ ସିସିଟିଭି କ୍ୟାମେରା ସଚଳ ଅବସ୍ଥାରେ ରହିବା ଆବଶ୍ୟକ।
୪. ଶାରୀରିକ ଭାବେ ଅସକ୍ଷମ ବ୍ୟକ୍ତିମାନଙ୍କ ପାଇଁ ସୁବିଧାଜନକ ପ୍ରବେଶ ବ୍ୟବସ୍ଥା ରହିବା ଦରକାର।

କିଛି ବର୍ଷ ପୂର୍ବରୁ ଭୁବନେଶ୍ୱରର SUM ହସ୍ପିଟାଲରେ ଘଟିଥିବା ଭୟାବହ ଅଗ୍ନିକାଣ୍ଡ ଆମକୁ ପ୍ରୟାପ୍ତ ଶିଖ୍ୟା ଦେଇପାରିଲା ନାହିଁ। ତାହାର ପୁନରାବୃତ୍ତି ଏବେ ଆମ ସମ୍ମୁଖରେ ଆଉ ଏକ କଷ୍ଟଦାୟକ ସତ୍ୟ ଭାବେ ଦେଖାଦେଇଛି।

ଏପରି ଘଟଣା ପରେ କେତେକ ଲକ୍ଷ ଟଙ୍କାକୁ “କ୍ଷତିପୂରଣ” ଭାବେ ଦିଆଯାଏ, ଏବଂ କିଛି ଦିନ କିମ୍ବା ମାସ ପରେ ଏହି ଘଟଣାମାନେ ମନରୁ ଲିଭିଯିବ—ପରବର୍ତ୍ତୀ ଏପରି ଘଟଣା ଘଟିବା ପର୍ଯ୍ୟନ୍ତ।

ଭାରତର ପ୍ରଶାସନିକ ବ୍ୟବସ୍ଥାରେ ଦାୟିତ୍ୱବୋଧର ଅଭାବ ସ୍ପଷ୍ଟ; ଏହିକାରଣରୁ ଦଣ୍ଡନୀତି ମଧ୍ୟ ପ୍ରାୟ ଅନୁପସ୍ଥିତ।
ପ୍ରାୟତଃ ଦେଖାଯାଏ—କେବଳ କ୍ଷତିପୂରଣ ଘୋଷଣା ଓ ଏକ ତଦନ୍ତ କମିଟିର ଗଠନ।

ଏହି ପରିପ୍ରେକ୍ଷ୍ୟରେ କିଛି ଗୁରୁତ୍ୱପୂର୍ଣ୍ଣ ପ୍ରଶ୍ନ—

• (୧) କଟକ ଓ ଭୁବନେଶ୍ୱରରେ ମୋଟ କେତେଟି କ୍ଲିନିକାଲ ଇଷ୍ଟାବ୍ଲିଶମେଣ୍ଟ ବର୍ତ୍ତମାନ ନିବନ୍ଧିତ ଓ ପୁନଃନବୀକୃତ?

• ୨) ସେମାନଙ୍କ ମଧ୍ୟରୁ କେତେଟିରେ ୨୪×୭ ପ୍ରଶିକ୍ଷିତ କର୍ମଚାରୀ ସହିତ ଅଗ୍ନିନିର୍ବାପଣ ବ୍ୟବସ୍ଥା ରହିଛି?

• ୩) କେତେଟି ସଂସ୍ଥାରେ ଅଗ୍ନିନିର୍ବାପଣ ଯାନ ପାଇଁ ଚାରିଦିଗରୁ ପ୍ରବେଶ ସୁବିଧା ରହିଛି?

• ୪) ଅଗ୍ନି ସୁରକ୍ଷା ବିଭାଗ ଦ୍ୱାରା ଏପରି ସଂସ୍ଥାମାନଙ୍କର ନିୟମିତ ପରୀକ୍ଷା କେତେ ବେଳେ କରାଯାଏ?

• ୫) ନିୟମ ଉଲ୍ଲଂଘନ କରିଥିବା କେତେଟି କ୍ଲିନିକାଲ ସଂସ୍ଥାକୁ ବନ୍ଦ କରାଯାଇଛି?
  (୬) ପର୍ଯ୍ୟାପ୍ତ ପରିମାଣ ର ପାର୍କିଂ ବ୍ୟବସ୍ଥା ବିନା କୌଣସି କ୍ଲିନିକାଲ ଇଷ୍ଟାବ୍ଲିଶମେଣ୍ଟକୁ / ଡାକ୍ତରଖାନା ସ୍ଥାପନା କୁ ଅନୁମତି ଦିଆଯାଉଛି କି?

• ୭) କଟକ ଓ ଭୁବନେଶ୍ୱରରେ କେତେଟି ଏପରି ଭବନ, ନ୍ୟାସନାଲ ବିଲ୍ଡିଂ କୋଡ୍-୨୦୦୫ ଅନୁସରଣ କରିନାହାନ୍ତି ?

ଏହାର ଉତ୍ତର କିଏ ଦେବେ?

ବୋଧହୁଏ କେହି ନୁହେଁ—

ଯେଉଁମାନେ ଦାୟୀ, ସେମାନେ ମଧ୍ୟ ନୁହେଁ।

ପ୍ରମୋଦ ଚନ୍ଦ୍ର ପଟ୍ଟନାୟକ, IAS (ଅବ.)