ଶରଧାବାଲି, ଭଜନ ଓ ‘ଖୋକା ଭାଇ’
- ପଢନ୍ତୁ ସୂର୍ଯ୍ୟ ଦେଓଙ୍କ ଅଙ୍ଗେ ନିଭା କାହାଣୀ
- ଶୁଣନ୍ତୁ ଅକ୍ଷୟ ମହାନ୍ତି ସୁମଧୁର ଭଜନ
- TATKAL ODISHA//ସ୍ମୃତି ଚିହ୍ନ//
- *******************************************
ଖୋକା ଭାଇ I ଅକ୍ଷୟ ମହାନ୍ତି I ଶରଧା ବାଲିରେ ‘ହେରାପଞ୍ଚମୀ’ ଅବସରରେ ହୋଇଥିବା ଭଜନ ସନ୍ଧ୍ୟାରେ ଭଜନ ବୋଲିବାକୁ ଯାଇଥିଲେ I
କାହା ସହିତ ଯାଇଥିଲେ? କେଉଁ ଗୀତ ଗାଇଲେ?
ସେଇ କଥା ତାଙ୍କ ସହ ‘ଟହଲିଆ’ ହୋଇ ଯାଇଥିବା ବିଶିଷ୍ଟ ସିନେ ସମୀକ୍ଷକ ଓ ସାମ୍ବାଦିକ ସୂର୍ଯ୍ୟ ଦେଓ ନିଜର ଅଙ୍ଗେ ନିଭା କଥା ବଖାଣିଛନ୍ତି I
ଆସନ୍ତୁ ତାଙ୍କ କଥା ପଢ଼ିବା ସହ ଖୋକା ଭାଇର ଶରଧାବାଲିରେ ଗାଇଥିବା ଗୀତ ଶୁଣିବା…
*********************************************
କେଉଁ ବର୍ଷ କହିପାରିବି ନାହିଁ, ଏତକ ମନେଅଛି ଯେ ହେରା ପଞ୍ଚମୀ ତିଥି ଥିଲା ଆଉ ଶରଧାବାଲିରେ ଭଜନ ସମାରୋହ ହେଉଥିଲା I ବୋଧେ ୯୩ କି ୯୪ ହେବ I
ଆର୍ଯ୍ୟ ଭାଇ ଅର୍ଥାତ ଅକ୍ଷୟ ମହାନ୍ତିଙ୍କ ସହ ମୁଁ ଟହଲିଆ ହୋଇ ଯାଇଥିଲି ସେଠିକି I ଅକ୍ଷୟ ମହାନ୍ତିଙ୍କ ଭାଷାରେ ଚମଚା I ସେତେବେଳେ ଏକ ସମ୍ବାଦପତ୍ରର ରବିବାର ମେଗାଜିନ ଦାୟିତ୍ୱରେ ଥିଲି I
ଅକ୍ଷୟ ମହାନ୍ତି ଅନ୍ୟମାନଙ୍କୁ ମୋତେ ଚିହ୍ନାଇ କହୁଥିଲେ ଇଏ ମୋର ରିପୋର୍ଟର ଚମଚା I ସେତେବେଳେ ମୋର ମାଇକ୍ରୋ ଟେପ ରେକର୍ଡରଟିଏ ଥାଏ, ସେଇ ହେରା ପଞ୍ଚମୀ ରାତିରେ ବି ଥିଲା I
ଭଜନ ସମାରୋହ ହେଉ କି ମେଲୋଡି ଅକ୍ଷୟ ମହାନ୍ତିଙ୍କ ବିଶେଷ କଥା ହେଉଛି, ଷ୍ଟେଜରେ ପହଞ୍ଚିଲେମାନେ ଗାଇବେ I ଗାଇବା ଆଗରୁ ଗପିବେ ଆଉ ଗାଇ ସାରିଲେ ସେଠି ରହିବେ ନାହିଁ I
ଗାଇବା ଆଗରୁ କଥା କହିବାର ଢଙ୍ଗ ଓ ଗାଇଲାବେଳେ ସ୍ଵରର ଯେଉଁ ଅଦ୍ଭୁତ ପରିବର୍ତ୍ତନ ସେ ଆଣୁଥିଲେ ତାହା ମଂଚ ଗାୟନର କାୟା କଳ୍ପକୁ ବଦଳାଇ ଦେଉଥିଲା I
ଅନେକ କ୍ଷେତ୍ର ପରି ଏଥିରେ ବି ସେ ପ୍ରଥମ I
ସେଇ ହେରା ପଞ୍ଚମୀ ରାତିରେ ସେ ଦୁଇଟି ଭଜନ ଗାଇଥିଲେ I
ଫେରିଲାବେଳେ ମୁଁ ରେକର୍ଡ କରିଥିବା ମାଇକ୍ରୋ ଟେପରୁ ସେ ଦୁଇଟି ଭଜନ ବଜେଇଲି ତ ସେ ବିରକ୍ତ ହେଲେ ଓ କହିଲେ ମୋର ନିଜର ଗୀତକୁ ବାରମ୍ବାର ଶୁଣିବା ଧୈର୍ଯ୍ୟ ମୋର ନାହିଁ I
କିନ୍ତୁ କାହିଁକି?
ମୁଁ ପ୍ରଶ୍ନ କଲି…
ଅକ୍ଷୟ ମହାନ୍ତି ତା’ର ନିଜ ହୃଦୟର ସ୍ପନ୍ଦନ ଗଣିବାକୁ ଭଲ ପାଏ ନାହିଁ I ଏ ଅଦ୍ଭୁତ ଉତ୍ତରରେ ମୁଁ ନିର୍ବାକ I ସେ ଦୁଇଟି ଗୀତରୁ ଗୋଟିଏକୁ ଏଠି ପୋଷ୍ଟ କରୁଛି..
ଅକ୍ଷୟ ମହାନ୍ତି ହୁଏତ ନିଜ ହୃଦୟର ସ୍ପନ୍ଦନ ଗଣିବାକୁ ଭଲ ପାଉ ନଥିଲେ… କିନ୍ତୁ ତାଙ୍କ ହୃଦୟର ସ୍ପନ୍ଦନ ଗଣି ଆମେ ଅଧିକାଂଶ ଓଡ଼ିଆ ଏଯାଏ ବଞ୍ଚିଛୁ I
ପ୍ରଣାମ ପ୍ରିୟ ଆର୍ଯ୍ୟ ଭାଇ….
- ଶୁଣନ୍ତୁ ଖୋକା ଭାଇଙ୍କ ସେଇ ସୁମଧୁର ଭଜନଟି…
- https://m.facebook.com/story.php?story_fbid=pfbid0tFTHSnxEbdbaJuo7QZvNZD6ipZWQPgpDVHNxbbXdvJmyakebbqFnoUCcEPaNsaHRl&id=1081726395