- ପାଣିରେ ପଚ ପଚ ରାଜଧାନୀ ଉପକଣ୍ଠ ଗାଁ
- ପିଚୁ ସଂଯୋଗ ନାହିଁ, ଦୁଇ ପ୍ରବେଶ ପଥ କାଦୁଅରେ ଭର୍ତ୍ତି
- ଭୁବନେଶ୍ୱର//TATKAL ODISHA//
- ରିପୋର୍ଟ : ବିଜୟ କୁମାର ସାହୁ /ସୁଦାମ ଭୋଇ
ପ୍ରତିବର୍ଷ ପ୍ରତି ପଞ୍ଚାୟତରେ ବିଭିନ୍ନ ଉନ୍ନୟନ ମୂଳକ କାର୍ଯ୍ୟ ପାଇଁ ବ୍ୟାପକ ଅର୍ଥ ବ୍ୟୟ ହୋଇଥାଏ I ଏଥିସହ ସାଂସଦ ଓ ବିଧାୟକ ପାଣ୍ଠି ବି ଖର୍ଚ୍ଚର ବ୍ୟବସ୍ଥା ରହିଛି I ମାତ୍ର ଶୁଣିଲେ ଆଶ୍ଚର୍ଯ୍ୟ ହେବେ ଯେ, ସ୍ମାର୍ଟ ସିଟି ଭୁବନେଶ୍ୱର ଉପକଣ୍ଠ ଦୁର୍ଗାପୁରପାଟଣା-ବାସୁଆଘାଇ ଗାଁରେ ତାର ବ୍ୟତିକ୍ରମ ଘଟିଛି I
ନା’ ଏଠି ଡ୍ରେନେଜ ରହିଛି? ନା’ କଂକ୍ରିଟ ରାସ୍ତା ରହିଛି??
ଗାଁକୁ ସଂଯୋଗ କରିଥିବା ଦୁଇ ପ୍ରମୁଖ ରାସ୍ତା ସାଧାରଣ ବର୍ଷାରେ ପଚ ପଚ I ବେଙ୍ଗ ମୁତିଲେ ଏଠି ପାଣି I ଦୀର୍ଘ ବର୍ଷ ଧରି ଏଭଳି ଅବ୍ୟବସ୍ଥା ଭିତରେ ଲୋକେ ରହୁଥିଲେ ହେଁ ବିଧାୟକ ଓ ସରପଞ୍ଚଙ୍କ ପାଇଁ କିଛି ଯାଏ ଆସେ ନାହିଁ I
ଭୋଟ ବେଳେ ଯେତେ ଭାଇ ଭାଇ… ଭୋଟ ପରେ ସେତେ ନାହିଁ ନାହିଁ I ସ୍ଥିତି ଏପରି ହୋଇଛି ଯେ, ଗାଁକୁ ଆମ୍ବୁଲାନ୍ସ ଆସିବା ବି ସମ୍ଭବପର ନୁହେଁ I
ଯଦି NH-316 ଓ ଟଙ୍କପାଣି ରୋଡ ସାଇ ମନ୍ଦିର ସଂଲଗ୍ନ ଗାଁର ଏଭଳି ସ୍ଥିତି, ତାହାଲେ ରାଜ୍ୟର ଉପାନ୍ତ ଇଲାକାରେ ଥିବା ଗାଁର ସ୍ଥିତି କଣ ଥିବ ଏଥିରୁ ସାଧାରଣରେ ଅନୁମେୟ I
ଏକାମ୍ର ବିଧାନସଭା କ୍ଷେତ୍ର ଅଧୀନରେ ଥିବା ଏବଂ ଦୁଇଟି ୱାର୍ଡ ବିଶିଷ୍ଟ ଦୁର୍ଗାପୁରପାଟଣା-ବାସୁଆଘାଇରେ ପ୍ରାୟ ଚାରି ହଜାର ଲୋକ ବସବାସ କରୁଛନ୍ତି I ଏଥିରୁ ଅନୁସୂଚିତ ଜାତି ବର୍ଗ ଲୋକଙ୍କ ସଂଖ୍ୟା ପ୍ରାୟ 1500ରୁ ସାମାନ୍ୟ ଅଧିକ I
ସରକାରୀ ନିୟମ ଅନୁସାରେ ଏହି ବର୍ଗ ଲୋକଙ୍କ ଜୀବନ ଧାରଣର ମାନ ଉନ୍ନତ କରିବା ରାସ୍ତା, ବିଜୁଳି, ଡ୍ରେନେଜ, ପାନୀୟ ଜଳ ଓ ସ୍ଥାୟୀ ଘର ଦେବାର ବ୍ୟବସ୍ଥା ରହିଛି I ହେଲେ ଏଠି ତାର ବି ବିଚ୍ୟୁତ ଘଟିଛି I ନେତା ବା ପ୍ରଶାସକ ନିଘା ନାହିଁ I
ନିର୍ବାଚନ ସମୟ ଛାଡିଦେଲେ ନେତାଙ୍କ ପ୍ରାୟ ଦେଖା ମିଳେନାହିଁ I ଫଳରେ କୌଣସି କାର୍ଯ୍ୟ ହୋଇ ପାରୁନି I
ଗାଁର ସମସ୍ୟା ଗୁଡ଼ିକ ହେଉଛି…
- ଲଗାଣ ବର୍ଷା ହେଲେ ଗାଁର ପାଣି ନିଷ୍କାସନ ହୁଏ ନାହିଁ I
- ସ୍ଥାୟୀ ଡ୍ରେନ ନାହିଁ, ପାଣି ଯିବା ନାଳସବୁ ଜବରଦଖଲ ହୋଇଛି I
- ରାସ୍ତା କଂକ୍ରିଟ ବା ପିଚୁ ହୋଇ ନାହିଁ I
- ବିଦ୍ୟୁତ ଖୁଣ୍ଟରେ ଷ୍ଟ୍ରିଟ ଲାଇଟ ଥିଲେ ବି ଜଳୁନାହିଁ I
- କମ୍ୟୁନିଟି ସେଣ୍ଟର ନାହିଁ କି ସ୍ୱୟଂ ସହାୟିକା ଗୋଷ୍ଠୀ ଘରନାହିଁ I
- ସ୍କୁଲ ଘର ଭଙ୍ଗା, ନାହାନ୍ତି ଆବଶ୍ୟକ ଶିକ୍ଷକ I ପାଞ୍ଚଟି ଶ୍ରେଣୀ ପାଇଁ ଦୁଇଟି ଅସଜଡ଼ା ଘର I ପିଲାମାନେ ବର୍ଷା ହେଲା ମାତ୍ର ଘରକୁ ପଳାନ୍ତି I
ତେବେ ଏହି ବିଷୟରେ ଗାଁ ଲୋକେ ସ୍ଥାନୀୟ ସରପଞ୍ଚ, ବିଡ଼ିଓ ଓ ବିଧାୟକଙ୍କୁ ବାରମ୍ବାର ଜଣାଇଲେ ବି ଫଳ ଶୂନ I
ତେଣୁ ଗାଁ ଲୋକେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦୃଷ୍ଟିକୁ ଆଣିବା ସହ ଫେରାଦ ହେବେ ବୋଲି ବିଶେଷ ସୂତ୍ରରୁ ଜଣାପଡ଼ିଛି I
